Frå august 2023 til august 2024 fekk Innlandet 1210 nye statsborgarar frå 85 ulike land. Dei nye innbyggjarane er spreidd over alle 46 kommunane i fylket, og Nord-Fron er stolte over å ha fått fleire av desse som ein del av vårt lokalsamfunn.

Ei høgtideleg markering

Statsborgarseremoniane inneheldt talar, musikkinnslag og avlegging av truskapsløftet til Noreg. Assisterande statsforvaltar Sigurd Tremoen leia seremoniane og understreka moglegheitene og ansvaret som følgjer med norsk statsborgarskap. Han framheva korleis nye innbyggjarar bidreg til kreativitet og styrking av lokalsamfunnet.

Fylkesordførar Thomas Breen heldt hovudtalen på Lillehammer og minna dei nye statsborgarane om viktigheita av deltaking i samfunnet, som å bruke stemmeretten og engasjere seg i lokalt arbeid.

Nord-Fron deltok 

Frå Nord-Fron kommune var ordførar Anne Marie Olstad til stades for å dele gleda med dei nye innbyggjarane på begge seremoniane.  Ho understreka at mangfald og inkludering er ein viktig del av det som gjer lokalsamfunnet rikt.

"Det er alltid ei stor glede å ønskje nye statsborgarar velkomne til kommunen vår," sa ordføraren. "Vi ser fram til å bli betre kjende med dykk og til å sjå korleis de vil vere med og prege lokalsamfunnet vårt."

Ein viktig tradisjon

Statsborgarseremoniane er ein årleg tradisjon som markerer overgangen til norsk statsborgarskap. Dette er ikkje berre ei høgtid for dei nye statsborgarane, men også ein påminnar for oss alle om verdien av fellesskap og mangfald.

Nord-Fron kommune ser fram til å følgje dei nye innbyggjarane på vegen vidare og ønskjer dei hjarteleg velkomne!